මැයි 08 සිකුරාදා

Posted May 6, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 13:26-33

පිළිතුරු ගීය – ගීතාවලිය 2:6-11

සුවිශේෂ ප්‍රකාශනය – ශු.ජොහාන් 14:1-6

 

සුවිශේෂ ප්‍රකාශනයෙන්

“ඔබේ සිත් නොකැළඹේවා! දෙවියන් වහන්සේ අදහා ගන්න. මා ද අදහන්න. මාගේ පියාණන් වහන්සේගේ නිවාසයෙහි බොහෝ වාසස්ථාන ඇත. එසේ නොවේ නම් ඒ බව මම ඔබට නොකියම්ද? ඔබට ස්ථානයක් සූදානම් කරන පිණිස යමි. මා ගොස් ඔබට ස්ථානයක් සූදානම් කළ විට මා සිටින තැන ඔබත් සිටින පිණිස, ඔබ කැඳවාගෙන යෑමට මම නැවත එන්නෙමි. මා යන ස්ථානයට මාර්ගය ඔබ දන්නහුය” යි වදාළ සේක. තෝමස් කථා කොට “ස්වාමිනී, ඔබ කොතනට වඩින සේක්දැයි අපි නොදනිමු. එසේ නම් මාර්ගය දැන ගන්නේ කෙසේදැ”යි ඇසීය. ජේසුස් වහන්සේ පිළිතුරු දෙමින් “මාර්ගයද සත්‍යයද ජීවනයද මම වෙමි. මා මඟින් මිස කිසිවෙක් පියාණන් වහන්සේ වෙත නොපැමිණෙන්නෙහිය”.

ආලෝකවත් අවදිවීම

මන්ද, පියාණන් වහන්සේද, පුත්‍රයාණන් වහන්සේද යන දෙදෙනාම එක්කෙනෙකු වන බැවිනි. ජුදා ඉගැන්වීම් තුළ දෙවියන් වහන්සේගේ නාමය පවා උච්චාරණය කිරීමට බියවූ ජනතාවකට තමන් වහන්සේව දකින්නා පියාණන් වහන්සේව දකින බවට ඉගැන්වීමට තරම් තමන් වහන්සේ පිළිබඳ ගැඹුරුම ගැඹුරු අනන්‍යතාවයක් සමිඳුන් සතු විය. ඒ නිසාම විය යුතුය, “ඔබේ සිත නොකැළඹේවා” යනුවෙන් මඟ පෙන්වීම ආරම්භ කරනුයේ. එපමණක් නොව තමන් වහන්සේ අබ්බා පියාණන් වෙත යෑමේ එකම දොරටුව බවත්, වෙනත් කිසිදු දොරටුවක් නොමැති බවත්, තමන් වහන්සේ මාර්ගය, සත්‍යය හා ජීවනය බවත් ප්‍රකාශ කරනුයේ එවැනි වූ අභ්‍යන්තරයකිනි.

මැයි 07 බ්‍රහස්පතින්දා

Posted May 6, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 13:13-25

පිළිතුරු ගීය – ගීතාවලිය 89:1-2, 20-21, 24, 26

සුවිශේෂ ප්‍රකාශනය – ශු.ජොහාන් 13:16-20

 

සුවිශේෂ ප්‍රකාශනයෙන්

ඒකාන්තයෙන්ම මම ඔබට කියමි. දාසයෙක් තම ස්වාමියාට වඩා උසස් නොවේ. එමෙන්ම යවන ලද්දෙක් ඔහු යවන්නාට වඩා උසස් නොවේ. මේ දේවල් දන්නහු නම්, දැන ඒවා පිළිපදින්නහු නම්, ඔබ භාග්‍යවන්තයෝය. මා කතා කරන්නේ ඔබ සැම දෙනාම ගැන නොවේ. මා තෝරාගත් අය මම හඳුනමි. එහෙත් “මාගේ භෝජනය වළඳන තැනැත්තා මට විරුද්ධව නැඟී ඇතැ”යි යන ශුද්ධ ලියවිල්ල ඉෂ්ඨ විය යුතුය. එය ඉටු වූ විට මම ඔවුන් වහන්සේම යැයි ඔබ විශ්වාස කරන පිණිස එය ඉටුවන්නට පෙර දැන් පවසමි. ඒකාන්තයෙන්ම මම ඔබට කියමි, මා යවන කවරෙකු නමුත් පිළිගන්නා මා පිළිගනියි. මා පිළිගන්නා මා එවා වදාළ තැනැන්වහන්සේ පිළිගනියි.

ආලෝකවත් අවදිවීම

පියාණන් වහන්සේගේ හදේ රිද්මය හඳුනා ගත් අප සමිඳාණන් වහන්සේගේ අවධානය අසරණයින්, පීඩිතයින්, දිළින්දන්, රෝගීන් හා පවුකාරයන් වෙත යොමු වූයේ සැබෑ ප්‍රේමයේ ලක්ෂණයන්හි ප්‍රතිමුර්තිය තමන් වහන්සේ බව ජනතාවට අවබෝධ කර ගැනීමට සලස්වා දෙමිනි. එවන් වූ ජනතාවගේ පැත්ත ගෙන ක්‍රියා කළේද අප සමිඳාණන්මය.

තවද සමිඳාණන් විසින් දූත කාර්යය සඳහා තෝරා ගත්තේද උගතුන් නොවීම කැපී පෙනෙන විශේෂත්වයකි. එම තෝරා ගත් ශ්‍රාවකයින්ගේ දැක්ම වූයේද අප සමිඳාණන් වහන්සේගෙන් ලත් ඉගැන්වීම්, ගුරුහරුකම් හා අත්දැකීම් මත ගොඩනැඟුණු ජීවිත ක්‍රමයයි.

මැයි 06 බදාදා

Posted May 5, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 12:24-13:5

පිළිතුරු ගීය – ගීතාවලිය 67:1-2, 4-5, 7

සුවිශේෂ ප්‍රකාශනය – ශු.ජොහාන් 12:44-50

 

සුවිශේෂ ප්‍රකාශනයෙන්

එවිට ජේසුස් වහන්සේ මහ හඬින් කතා කරමින් “මා අදහන තැනැත්තේ මා නොව මා එවා වදාළ තැනැන් වහන්සේ අදහා ගනී. එසේම මා දකින තැනැත්තේ මා එවා වදාළ තැනැන් වහන්සේ දකියි. මා ලෝකයට ආලෝකයක්ව වැඩියේ මා අදහන කවරෙකු නමුදු අන්ධකාරයෙහි නොවසන පිණිසය. තවද යමෙක් මාගේ වචනය අසා ඒවා නොපිළිපදින්නේ නම් මම ඔහු විනිශ්චය නොකරමි. මා ආවේ ලෝකය ගලවන්නට මිස විනිශ්චය කරන්නට නොවේ. මා ප්‍රතික්ෂේප කර මාගේ වචන නොපිළිගන්නා අය විනිශ්චය කරන්නෙක් සිතියි. මා වදාළ ධර්මයම අන්තිම දවසේදී ඔහුව විනිශ්චය කරන්නේය. මන්ද මම මගේම අධිකාරී බලයෙන් කථා නොකළෙමි. මා එවා වදාළ පියාණන් වහන්සේ මා කිව යුතු දෙයත්, දෙසිය යුතු දෙයත් ගැන මට ආඥවක් දී තිබේ. ඔවුන් වහන්සේගේ ආඥාව සදාතන ජීවනය වන බව මම දනිමි. එබැවින් මා පවසන දේ, පියාණන් වහන්සේ මට පැවසූ ලෙසින් ම මමත් පවසමි.” යි වදාළ සේක.

ආලෝකවත් අවදිවීම

ඔවුන් වහන්සේගේ පරම අභිලාශය නම් සියල්ලන්ව පියාණන් වහන්සේ වෙතට සමීප කිරීමයි. එහිදී ඔවුන් වහන්සේගේ කැමැත්ත මෙසේ පියාණන් වහන්සේ වෙතට කැඳවාගත් ජනතාව, තෝරාගත් ජනතාව අන්ධකාරයේ නොහැසිර ආලෝකයේ දරුවන් වශයෙන් ක්‍රියා කිරීමයි. බැඳ දමා තිබෙන වහල් යදම් බැමි වලින් නිදහස් වීමයි. යක්ෂයා ලෝකයා මාංශය යන ත්‍රිවිධ සතුරන්ට විරුද්ධව දේව වචනය බල අවියක් කරගැනීමයි. එබැවින් කවරෙකුවත් ඔවුන් වහන්සේ ඉවත නොදමන සේක. ඔවුන් වහන්සේගේ පිපාසය නම් සියලු නපුරෙන් අප ගළවා ගැනීමය. සදාතන ජීවිතයේ උරුමය ලබන්නට නම් ඔවුන් වහන්සේව දකිමින් ඔවුන් වහන්සේට සමීප විය යුතුය. ඔවුන් වහන්සේව දකින්නා පියාණන් වහන්සේවද ද්කින බව පවසන්නේ ශුද්ධාත්මයාණන්ගේ ගැඹුරුම අනාවරණයක් වූ සාංඝික ජීවිතය ලොවට ප්‍රකාශ කිරීමට නොවේද? තවද පියාණන් වහන්සේට නිරන්තරයෙන් සවන් දුන් ඔවුන් වහන්සේ විසින් “අබ්බා” පියාණන්ගේ මුළු විශ්වය පිළිබඳ මහා සිහිනය, සැලැස්ම අනාවරණය කරනු ලැබූහ. එයට නතු වීමට අද දින සුපුවතින් සමිඳාණෝ ඇරයුම් කරන සේක.

මැයි 05 අඟහරුවාදා

Posted May 5, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 11:19-26

පිළිතුරු ගීය – ගීතාවලිය 87:1-7

සුවිශේෂ ප්‍රකාශනය – ශු.ජොහාන් 10:22-30

 

සුවිශේෂ ප්‍රකාශනයෙන්

ජේසුස් වහන්සේ දේව මාළිගාවේ සලමොන්ගේ ද්වාර මණ්ඩපයේ සක්මන් කරමින් සිටි සේක. ජුදෙව්වරු පැමිණ ඔවුන් වහන්සේව වටකරගෙන “ඔබ කොතෙක් කල් අප සැක පිට තබන සේක්ද? ඔබ ක්‍රිස්තුවරයාණෝ නම් පැහැදිළි ලෙස අපට කිව මැනව”යි කීහ. ජේසුස් වහන්සේ පිළිතුරු දෙමින් “ඔබට මම කීවෙමි. එහෙත් ඔබ විශ්වාස නොකරන්නහු ය. මාගේ පියාණන් වහන්සේගේ නාමයෙන් මා කරන ක්‍රියාවෝම මා ගැන සාක්ෂි දෙති. එහෙත් ඔබ මාගේ බැටළුවන් නොවන හෙයින් මා විශ්වාස නොකරන්නහු ය. මාගේ බැටළුවෝ මාගේ කටහඬ අසති. මමද ඔවුන් හඳුනමි. ඔවුහු ද මා පසුපස්සේ එති.මම ඔවුනට සදාතන ජීවනය දෙමි. ඔවුහු විනාශ නොවෙති… ඔවුන් මාහට දෙවා වදාළ මාගේ පියාණන් වහන්සේ සියල්ලන්ටම වඩා ශ්‍රේෂ්ඨය. පියාණන් වහන්සේ අතින් ඔවුන් පැහැර ගන්නට කිසිවෙකුට නොහැකිය. මාත් මාගේ පියාණන් වහන්සේත් එකමය” යි වදාළ සේක.

ආලෝකවත් අවදිවීම

දෙවියන් වහන්සේ තම පියාණන් බව ප්‍රකාශ කිරීම නිසා, ජනතාව ක්‍රිස්තුස් වහන්සේව ප්‍රතික්ෂේප කරනු ලබන බව දැන දැනත්, ඒ බව නැවත නැවත ප්‍රකාශ කරන්නට තරම් ඔවුන් වහන්සේ නිර්භීත වූ සේක; පියාණන් වහන්සේ හා ඒකාත්වයක් තුළ පැවතුණු සේක. සැබෑ මනුෂ්‍යයෙකු ලෙස මෙලොවට වැඩම කර පියාණන් වහන්සේගේ නාමයෙන් සිදුකළ ප්‍රාතිහාර්යයන් වඩ වඩා අසන්නට දකින්නට ලැබුණු විටදීත් ඔවුන් වහන්සේ දේව පුත්‍රයා බව පිළිගන්නට ජුදෙව්වරු අකමැති වූහ. ප්‍රතික්ෂේප කිරීම අබියස ද පුත්‍රයාණන් වහන්සේ, පියාණන් වහන්සේ වෙනුවෙන් ක්‍රියා කළ සේක.

මැයි 04 සඳුදා

Posted May 5, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 11:1-18

පිළිතුරු ගීය – ගීතාවලිය 42:1-2, 43:3-4

සුවිශේෂ ප්‍රකාශනය – ශු.ජොහාන් 10:1-10

 

සුවිශේෂ ප්‍රකාශනයෙන්

ජේසුස් වහන්සේ ඔවුන් අමතා,”ඒකාන්තයෙන්ම මම ඔබට කියමි, බැටළුවන්ට දොරටුව මම ය. මට පළමුව ආ සියල්ලෝම සොරුද කොල්ලකන්නෝද වෙති. බැටළුවෝ ඔවුන්ට ඇහුම්කන් නුදුන්හ. දොරටුව මමය. මා තුළින් යමෙක් ඇතුළු වන්නේද, ඔහු ගළවනු ලැබ ඇතුළට හා පිටතට ගොස් ආහාර ලබන්නේය. සොරා එන්නේ සොරකම් කරන්නටත් මරන්නටත් විනාශ කරන්නටත් පමණකි. මා පැමිණියේ ඔවුන් හට ජීවනය ලැබෙන පිණිසය. සපුරාම ලැබෙන පිඋණිසය.

ආලෝකවත් අවදිවීම

බැටළුවා අහිංසකය, කීකරුය. ඒ නිසාම එඬේරා සමඟ ඇත්තේ ගැඹුරු සබඳතාවයකි. ආහාර පාන, රැකවරණය, මඟපෙන්වීම සඳහා එඬේරාගෙන් යැපේ. එඬේරාගෙන් හැර වෙනත් කෙනෙකුගෙන් පිහිටක් නැත. එඬේරා බැටළුවාගේ ගැළවුම්කරුවාය. එඬේරාගේ කටහඬ බැටළුවා හොඳින් හඳුනා ගනියි.

දෙවි පියාණන් වහන්සේ එකම එඬේරා කරගත් පුත්‍රයාණන් වහන්සේ පියාණන් වහන්සේගේ හඬ හොඳාකාර හඳුනා ගත් සේක. දෙවි සමිඳාණන්ගේ බැටළු පෝතකයාණන් වන ඔවුන් වහන්සේ පියාණන් වහන්සේගෙන් පූර්ණව යැපුණු සේක. ජොර්දාන් ගඟේදී ශුද්ධාත්ම ස්නාපනය ලද ඔවුන් වහන්සේ තම අනන්‍යතාවය හඳුනා ගත් සේක. පියාණන් වහන්සේ විසින් අනාවරණය කරන ලද පුත්‍ර භාවයේ අභිරහස්මක උත්තරීතර බව මුළුමනින් අයිති කරගෙන අවදිව විටි බවකි. තමන් වහන්සේ වෙත පවරා දෙන ලද දූත සේවාවේ වටිනාකම ශුද්ධාත්මයාණන්ගේ මඟ පෙන්වීම අනුව යමින් ඉටුකරන්නට පූර්ණව කැපවූ, මරණය ජයගත් ජේසුස් ක්‍රිස්තුන් වහන්සේ ජීවමානව නිරන්තරයෙන් අප සමඟ නැවතී වැඩවසන සේක.

මැයි 03 ඉරිදා

Posted May 5, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 4:8-12

පිළිතුරු ගීය – ගීතාවලිය 118:1,8-9, 21-23, 26, 28-29

දෙවන දේව ප්‍රකාශනය – 1 ජොහාන් 3:1-2

සුවිශේෂ ප්‍රකාශනය – ශු.ජොහාන් 10:11-18

උත්ථාන සමයේ සතරවන ඉරුදින

 

සුවිශේෂ ප්‍රකාශනයෙන්

“මම යහපත් එඬේරා වෙමි. යහපත් එඬේර තම ජීවිතය බැටළුවන් උදෙසා පූජා කරන්නේය. එඬේරෙකු නොවන, එසේම බැටළුවන්ගේ අයිතිකාරයාද නොවන කුලිකාරයා වෘකයා එනු දැක බැටළුවන් හැර දමා පලා යන්නේය. වෘකයාද උන් වෙත කඩා පැන විසුරුවා හරින්නේය.ඔහු පලා යන්නේ ඔහු කුලීකාරයකු නිසාත්, බැටළුවන් ගැන සැලකිල්ලක් ඔහුට නැති නිසාත් ය. මම යහපත් බැටළු එඬේරා වෙමි. මම මාගේ බැටළුවන් අඳුනමි. ඔවුහු ද මා අඳුනති. පියාණන් වහන්සේ මා ද ,මා පියාණන් වහන්සේ ද අඳුනන්නාක් මෙන් මම මාගේ බැටළුවන් අඳුනමි. බැටළුවන් උදෙසා මගේ දිවි පුද දෙමි…”

ආලෝකවත් අවදිවීම

එදා තම බැටළුවන් රැගෙන එඬේරා ගියේ බැටළුවන් ඉදිරියෙනි. එහිදී යම් සතුරු උවදුරක් වෙතොත් එයින් බැටළුවන් මුදා ගන්නේ එඬේරා විසිනි. එහිදී සමහර විට ඔහුගේ ජීවිතය වුවද නැති විය. බැටළුවන්ගෙන් එකෙකු හෝ මංමුළා වී නොයන්නට එඬේරා වගබලා ගත්තේය. එහිදී එඬේරාගේ හඬ බැටළුවෝ හඳුනති. ඔහු පසුපසිනි බැටළු රැළම ගමන් කළේ. එලෙසම අප සමිඳාණන් වහන්සේද මුළු විශ්ව මාතාවගේ දරු කැළම තම බැටළු රැළ කර ගන්නා සේක. ඔවුන් වෙනුවෙන් නපුරාව පරාජය කරමින් ඔවුන් වහන්සේ දිවි පුද කළ සේක. ඒ ජයග්‍රහණය තෝරා ගත් ජනතාවට භුක්ති විඳීමට සැලසූ සේක. මුළු මානව සංහතියටම විමුක්තිය අත්පත් කර දීමට ඔවුන් වහන්සේ සා පිපාසා වන්නේ ඔවුන් වහන්සේගේ ප්‍රේමය නිසාමය. එලෙසින්ම ඔවුන් වහන්සේ තමන් වහන්සේ අනුව පැමිණෙන්නන් හඳුනා ගනිති. ඔවුන්ගෙන් එක් අයෙකුවත් විනාශ වෙන්නට ඉඩ නොදෙන බව, ඔවුන් මඟ හැර නොයන බව ඔවුන් වහන්සේ අද සුපුවතින් පෙන්වා දෙන සේක.

මැයි 02 සෙනසුරාදා

Posted May 5, 2009 by Bernadine
Categories: සුදතුම් ගමන

පළමුවන දේව ප්‍රකාශනය – ක්‍රියා 9:31-42

පිළිතුරු ගීය – ගීතාවලිය 116:12-17

සුවිශේෂ ප්‍රකාශනය – ශු.ජොහාන් 6:60-69

ශාන්ත අතනාසියුස් මුනිඳුන්

 

පළමු ප්‍රකාශනයෙන්

මෙසේ ජුදයෙහිද ,ගලීලයෙහිද, සමාරියෙහිද සභාවට සාමයේ කාලයක් ඇතිවිය. සභව ශක්තිසම්පන්නව දේව ගෞරවයෙහිද, ශුද්ධත්ම වරප්‍රසාදයෙහිද පවතිමින් වැඩි වර්ධනය වූවාය. තවද පේදුරු සියළු පළාත්වල සැරිසරා ලිද්දායෙහි විසූ සැදැහැවතුන් වෙතට පැමිණියේය. එහි අට අවුරුද්දක් අංශභාග රෝගයෙන් ඔත්පලව හුන් අයිනෙයස් නම් මිනිසෙක් ඔහුට හමුවිය. පේදුරු ඔහුට කතාකොට, “අයිනෙයස් ජේසු ක්‍රිස්තුස් වහන්සේ ඔබට සුවය දෙන සෙක. නැඟිට ඔබේ යහන සකස්කර ගන්නැ”යි කීය. එකෙණෙහිම ඔහු නැඟිට්ටේය. ලිද්දායෙහිද ශිරොනෙහිද විසූ සියල්ලෝ ඔහු දැක ස්වාමින් වහන්සේ සරණ ගියහ…

ආලෝකවත් අවදිවීම

ජේසුස් ස්වාමින් වහන්සේ මෙලොවට වැඩම කර ධර්මය දේශනා කරමින්, නොයෙකුත් පෙළහර පාමින්, සමාව දනය කරමින් තමන් දෙවියන් වහන්සේගේ එකම පුත්‍රයාණන් බව මෙලොවට ප්‍රකාශ කළ සේක. උත්ථානවූ කිතු සමිඳුන්ව ළඟින් ඇසුරු කළ ශුද්ධවු පේදුරු තුමා කිතු සමිඳුන්ගෙ උත්ථානයෙන් පසු රෝගීන් සුව කරන ආකරය පුදුම සහගතය. කිතුනුවන් හැටියට ඔවුන් වහන්සේව ළඟින් ඇසුරු කරන අපගේ ජීවිත මඟින්ද ඔවුන් වහන්සේ පුදුමාකාර දේ කරනවා නොඅනුමානය. අප ඔවුන් වහන්සේ සමඟ ජීවත්වන ප්‍රමාණයට ඔවුන් වහන්සේ තුළ පවතින ප්‍රමාණයට ඔවුන් වහන්සේ අපගේ ජීවිත තුළින් මහත් දේ කරන සේක.

මැයි 01 සිකුරාදා

Posted May 5, 2009 by Bernadine
Categories: සුදතුම් ගමන

“දිළිඳු වූ ඔබ භාග්‍යවන්තයෝය,

මන්ද, දෙවියන් වහන්සේගේ රාජ්‍යය ඔබගේය”

 

පළමුවන දේව ප්‍රකාශනය – උත්පත්ති 1:26-2:3, කොලොස්සි 3:147-15,17,23-24, ක්‍රියා 9:1-20

පිළිතුරු ගීය – ගීතාවලිය 90:2-4, 12-14, 16, ගීතාවලිය 117:1-2දෙවන දේව ප්‍රකාශනය – ගලාති 4:4-7

සුවිශේෂ ප්‍රකාශනය – ශු.මතෙව් 13:54-58, ශු.ජොහන් 6:52-59

කම්කරු ශාන්ත ජුසේ මුනිඳුන්

 

සුවිශේෂ ප්‍රකාශනයෙන්

… යමෙක් මාගේ මාංශය අනුභව කරන්නේද, ඔහුට ස්දාතන ජීවනය ඇත. මාගේ මාංශය සැබෑ භෝජනය ව. මාගේ රුධිරය සැබෑ පානය වේ… මේ වනාහි ස්වර්ගයෙන් පහළ වූ භෝජනය වේ…

 

ආලෝකවත් අවදිවීම

ජේසු සමිඳාණන්ගේ ඓතිහාසික විමුක්තියේ ගමන කෙළවර වූයේ කල්වාරිය මත පිදූ ජීවිත පූජාව තුළය. එය මුළු මිනිස් සංහතියටම විමුක්තිය අයිති කරදෙනු සඳහා පිදුනාවූ සැබෑ විමුක්තියේ පූජාවක්ම විය; විමුක්තියේ යාගයක්ම විය. එබැවින් “මාගේ මාංශය සැබෑ භෝජනය වේ. මාගේ රුධිරය සැබෑ පානය වේ” යන වදන් තුළ ගැබ් වී ඇත්තේ ඔවුන් වහන්සේගේ මුළු ජීවිතය පුරාම විමුක්තිය, නිදහස අයිති කර දෙනු සඳහා ඔවුන් වහන්සේ කළාවූ එම කැපවීමයි, පූජාවීමයි.

එදා 1896 මැයි 1 වන දින, ඇමරිකාවේ චිකාගෝ නුවරදී පැය 16 ක වැඩ මුරය පැය 8 දක්වා අඩුකර දෙන ලෙස ඉල්ලා පෙළපාලි ගිය අසරණ කම්කරු පිරිස කළ ඒ උදාර ජීවිත පූජාව ද, අද ලොව කම්කරු ජනතාව භුක්ති විඳින අයිතිවාසිකම් දිනා දෙන්නට සිදුකළ ඓතිහාසික කැපකිරීමකි.

යමෙකුගේ විමුක්තිය – නිදහස පතා අප විසින් සිදුකළ යුතු යම් කැපකිරීමක්, පූජා වීමක් වේද, එය කැමැත්තෙන්ම ඉටු කරලන්නට අවදි වෙමු.

ජනවාරි 01 බ්‍රහස්පතින්දා

Posted January 1, 2009 by Bernadine
Categories: සුදතුම් ගමන

සැමට සුදත් අනුහස පිරි සෞභාග්‍යමත් නව වසරක් වේවා..!

 

ඓතිහාසික කිතු උපතින් දෙදහස් නවවැනි වසරට පා තබන මේ ආනන්දජනක නැවුම් දිනය සභා මාතාව වෙන්කර ඇත්තේ පරිශුද්ධ මාතෘත්වයේ මංගල්‍යය සැමරීමටය. ලෝ වැසි ජනතාවගේ හදවත් තුළ නවමු බලාපොරොත්තු ජනිත කරමින් උදාවූ මේ නව වසර වෙනුවෙන් භාග්‍යවන්ත දේව මාතාවන් හා එක්වී, තුති පසස් ගයමින් දෙවි සමිඳාණන් පසසමු.

 

පළමුවන දේව ප්‍රකාශනය – ගණන් කථාව 6:22-27

පිළිතුරු ගීය – ගීතාවලිය 67:1-7

දෙවන දේව ප්‍රකාශනය – ගලාති 4:4-7

සුවිශේෂ ප්‍රකාශනය – ශු.ලූක් 2:15-21

මරියෝත්තමාවන්ගේ පරිශුද්ධ දේව මාතෘත්වයේ මංගල්‍යය

 

සුවිශේෂ ප්‍රකාශනයෙන්

… ඔවුහු යුහුව ගොස් මරිය තුමියද, ජෝසෙප්ද, ගව ඔරුවක සතප්වා උන් බිළිඳාද දුටුවෝය… ඒ ඇසූ සියල්ලෝ එඬේරුන් පැවසූ සියල්ල ගැන මවිත වූහ. එහෙත් මරිය තුමී එකී සියල්ල සිත් හි නිදන්කොට ඒවා මෙනෙහි කළාය…

 

ආලෝකවත් අවදිවීම

පියාණන් වහන්සේගේ කැමැත්තට පූර්ණව අවනත වෙමින් දේව තේජස – මහිමය හිස්කර මිනිසත් බව ගෙන ගව ලෙනක උපත ලබා, ගව ඔරුවක සතපවා සිටින ජේසු බිළිඳාණන් දෙස නෙත් යොමා සිටින භාග්‍යවන්ත මාතාවන් දෙස නෙත සිත යොමු කරමු. ජේසු සමිඳාණන්ට මාතෘත්වය දුන් එතුමිය දෙස බැලීම, කිතු සමිඳාණන් දෙස වැඩිවැඩියෙන් නෙත් යොමන්නට අප අවදි කරවන බවකි. සුපුවතින් දිගහැරෙන, “මරිය තුමී එකී සියල්ල සිත් හි නිදන්කොට මෙනෙහි කළාය” යන්න සවන්ගත වෙද්දී, භාග්‍යවන්ත මාතාව අප හමුවේ අභියෝගාත්මක දසුනක් රූගත කරන්නීය. දේව දූතයා මංගලම් කී මොහොතේ සිට පුත්‍රයාණන් සමඟ කුරුස පාමුල දක්වාම සියල්ල සිදුවී ඇත්තේ අහඹුවෙන් නොව, දෙවි පියාණන් වහන්සේගේ සැලැස්මට පාලනයට අනුකූලව බව වටහාගත් එතුමිය, සැම විටම ඔවුන් වහන්සේ කෙරෙහි ගැඹුරු ඒශ්වාසයකින් යුතුව බලාපොරොත්තුවේ දෑස් දල්වාගෙන නිහඬව බලා සිටියාය. දේව වචනය සිත් හි නිදන් කරගෙන මෙනෙහි කිරීම, එතුමියගේ බගවත් දිවි මඟට මහා බලයක් විය. ක්‍රිස්තුන් වහන්සේවත් ඔවුන් වහන්සේගේ දූත මෙහෙවරත් පූර්ණව හඳුනාගෙන තම කැඳවුමට සියයට සියයක්ම උපරිමයෙන් සාක්ෂි දැරූ එතුමිය අප දිවි මඟට මහා අභියෝගයකි, සමිඳුන් වෙතින් ලද උතුම් තිළිණයකි.

භාග්‍යවන්ත මාතාවන් හරහා මේ නව වසර පුරාම වැඩි වැඩියෙන් ජේසු ක්‍රිස්තුන් වහන්සේ දෙස බලන්නට යොමු වෙමු. “මා අනුව එන්න” යන සමිඳු හඬට අවදි වෙමින් දේශය තුළ, සංඝය – මීසම තුළ, පවුල තුළ දේව පුත්‍රභාවයෙහි උරුමය රැක ගනිමින් සාක්ෂි දරන්නට කැපවෙමු. මේ වසර පුරා ජීවිත ගමනේ හැල හැප්පීම්, කැළඹීම්, හුදකලා වීම්, සතුට – කඳුළ අප වෙලා ගත්තත් ගැඹුරු නිසලතාවයකට ඇතුල් වී දෙවි පියාණන් වහන්සේගේ අසීමිත ආදරයේ පහස විඳින්නට බලය අයැද සිටිමු.

දෙසැම්බර් 18 බ්‍රහස්පතින්දා

Posted December 18, 2008 by Bernadine
Categories: සුදතුම් ගමන

පළමුවන දේව ප්‍රකාශනය – ජෙරමියා 23:5-8

පිළිතුරු ගීය – ගීතාවලිය 72:1-2, 12-13, 18-19

සුවිශේෂ ප්‍රකාශනය – ශු.මතෙව් 1:18-23

 

සුවිශේෂ ප්‍රකාශනයෙන්

ජේසුස් ක්‍රිස්තුන් වහන්සේගේ උපත සිදුවූයේ මෙසේය: ඔවුන් වහන්සේගේ මෑණියන් වූ මරිය තුමී ජෝසෙප් හා විවාහ ගිවිසගෙන සිටියදී, ඔවුන් එක්වන්ට පෙර ශුද්ධාත්මයාණන් අනුහසින් ඈ ගැබ් ගෙන සිටින බව දැනගන්නා ලදී.

ඇගේ ස්වාමි පුරුෂයා වන ජෝසෙප්, සත්පුරුෂයෙකු වූ බැවින් ඇය ප්‍රසිද්ධියේ නින්දාවට නොපමුණුවන අදහසින්, රහසින් ඇය අථැර දමන්ට සිතා ගත්තේය. එහෙත් ඔහු මේ කාරණය ගැන කල්පනා කරමින් සිටියදී, ස්වාමින් වහන්සේගේ දූතයෙක් සිහිනයකින් ඔහුට දර්ශනය වී, “දාවිත්ගේ පුත් ජෝසෙප්, ඔබේ බිරිඳවන මරියා පාවා ගන්ට බිය නොවන්න. මන්ද, ඈ ගැබ්ගෙන ඇත්තේ ශුද්ධාත්මයාණන් අනුහසිනි. ඈ පුතෙකු බිහි කරන්නීය. ඔවුන් වහන්සේට ජේසුස් යන නාමය තැබිය යුතුය. මන්ද, සිය සෙනඟ ඔවුන්ගේ පාපවලින් මුදාලන්නේ එතුමාණෝය”යි කීය…

ආලෝකවත් අවදිවීම

ප්‍රසාද ස්නාපනයේ පින් හේතුවෙන් අද මම දේව දරුවෙක්මි. ශාරිරික, මානසික, ආත්මික කුමන දිළිඳුකමක් අත්දැක්කත්, මා වෙත එන ඒ හඬ: “දිළිඳු වූ ඔබ භාග්‍යවන්තය” (ශු.ලූක් 6:20). ජේසු සමිඳාණන් මනුෂ්‍ය දුබලකම් රැසකින් පිරි පරම්පරාවකින් පැවතියත්, ශුද්ධාත්මයාණන්ගෙන් පිරෙමින්, පැවතෙමින් ජනිතවූ නිසාම, අලුත් සිතක්, අලුත් හදක්, අලුත් පැවැත්මක්, අලුත් ගමනක්…!

“මිනිස් සිතේ තැන්පත් වී

රජ කරනා

දීන බවේ ශෝක තැවුල්

භය දුරලා

නිදහසේ දොර හරිනා

දෙවිඳු පෙමින් පණ පොවනා

නව අරුතෙන් දිවි වඩනා

විමුක්තියක් උපන් වගයි..! “

 

ඒ විමුක්තිදායකයාණෝ මෙසේ අප කැඳවන සේක:

“එන්න” – මා අනුව එන්න!

“යන්න” – දිළිඳුන් හට සුබ අස්න දෙසන්න

“එහෙත් ඉන්න” – මගේ රජකම තුළම ඉන්න; රාජකීය, පූජක, දිවැසි කාර්යය තුළම ඉන්න.

එම සමිඳු කැඳවුමට පිළිතුරු දෙන්නට, දකිමි බැරි බවක්.

එබැවින්, “මගේ කයෙහි, මගේ හදෙහි, උඩු සිතෙහි යටි සිතෙහි මාංශගත කරන්න වචනයාණන් ශුද්ධාත්මයාණෙනී..!”